រមណីយដ្ឋានធម្មជាតិថ្មរូង

រមណីយដ្ឋានធម្មជាតិថ្មរូង
©អត្ថបទ & ©រូបថត ដោយ ហេង ដារី
©រាល់ការចម្លងដោយគ្មានការរអនុញ្ញាតពីនគរអាន នឹងត្រូវមានទោសតាមច្បាប់

ពេលត្រលប់មកពីកោះកុងវិញ ដើម្បីកុំឱ្យខាតជើង យើងគួរចូលលេងនៅថ្មរូងសិន។ កន្លែងនេះក៏ជា​តំបន់ធម្មជាតិមួយដ៏ស្រស់ស្អាតដែរ ដែលស្ថិតនៅព្រំប្រទល់រវាងខេត្តកោះកុង និងខេត្តកំពង់ស្ពឺ។

ថ្មរូងជារមណីយដ្ឋានធម្មជាតិទឹកជ្រោះ ដែលមានប្រភពទឹកមកពីតំបន់ភ្នំក្រវាញ។
ក្រៅពីទឹកជ្រោះហូរកាត់ផ្ទាំងថ្ម នៅមានព្រៃភ្នំខៀវស្រងាត់ និងខ្យល់អាកាសបរិសុទ្ធល្អទៀត។

សម្រាប់អ្នកមិនចូលចិត្តទឹកធ្លាក់ខ្លាំង គួរទៅលេងនៅរដូវប្រាំង។ មានទឹកជ្រោះហូរតិចៗកាត់ផ្ទាំងថ្ម ហើយកន្លែងខ្លះគោក មានសុទ្ធតែផ្ទាំងថ្ម ដែលអាចឱ្យយើងឈរលេង និងដើរឆ្លងកាត់បាន។
ប៉ុន្តែប្រយ័ត្នផងសម្រាប់កុមារតូចៗ និងមនុស្សចាស់ ផ្ទាំង​ថ្មទាំងនោះរអិលបន្តិច!
សម្រាប់អ្នកចូលចិត្តលេងទឹកហូរខ្លាំង គួរទៅលេងនៅរដូវវស្សា។ មានទឹកជ្រោះ និងទឹកធ្លាក់ខ្លាំង ហើយធម្មជាតិក៏ស្រស់បំព្រងផងដែរ។

ថ្មរូងនៅរដូវប្រាំង

នៅទីនោះ ជាកន្លែងពេញនិយមណាស់សម្រាប់កុមារ ដែលចូលចិត្តលេងទឹក និងងូតទឹក។
ឯយុវវ័យដែលចូលចិត្តថតសែលហ្វ៊ីក៏ពិសេសដែរ។ មានផ្ទាំងថ្ម មានទោងសម្រាប់អង្គុយ និងមានកម្រងផ្កាសម្រាប់ពាក់លម្អក្បាលទុកថតទៀត។

ថ្មរូង មានកន្លែងងូតទឹកលេងយ៉ាងត្រជាក់ចិត្ត

នៅថ្មរូងមានរោងធ្វើអំពីស្លឹកជាច្រើនដែលស្ថិតនៅក្បែរទឹក។ នៅរោងនីមួយៗមានអង្រឹង សម្រាប់អង្គុយលេង និងញ៉ាំអាហារផងដែរ។ ទាំងអាហារ ទាំងរោងសម្រាប់អង្គុយត្រូវបានកំណត់តម្លៃដោយសហគមន៍នៅទីនោះ។
ហើយនៅទីនោះ ការគ្រប់គ្រងសំរាមបានស្អាតល្អ មិនឃើញចោលពាសវាលពាលកាល ដូចនៅទឹកធ្លាក់តាតៃទេ។

ថ្មរូង កន្លែងសម្រាប់ថត

បើយើងធ្វើដំណើរពីភ្នំពេញត្រូវចំណាយពេលប្រហែល២ម៉ោង ក្នុងចម្ងាមផ្លូវប្រមាណ១១៥គ.ម តាមផ្លូវជាតិលេខ៤។ រមណីយដ្ឋានធម្មជាតិថ្មរូងស្ថិតនៅក្នុងភូមិព្រៃប្រសិទ្ធិ៍ ឃុំបាក់រទេះ ស្រុកកំពង់សិលា ខេត្តកោះកុង។

សូមអានអត្ថបទ៖
- ខេត្តកោះកុង
- ចេតិយឃុនឆាង
- តាតៃ
- កោះស្តេច
-​ ព្រៃកោងកាង
- ផ្ទះត្រចៀកកាំ