សៀវភៅមួយក្បាលនេះកើតឡើង ដោយសារតែ សុជីវី ម្នាក់គត់ដែលសួររកលេខបន្តឥតល្ហែ ទោះអ្នកសរសេរក្តៀនប៉ុណ្ណាក៏ប្រឹងដែរ... អរគុណណាស់សុជីវីដែលធ្វើឱ្យបងលេចបានមួយដុំនេះមក!
Review ហើយ Review ទៀត
ផុស ហើយ ផុសទៀត
Share ហើយ Share ទៀត ជួយជាកម្លាំងចិត្តគ្មានហ្ហែ
(អត្ថបទថ្ងៃទី២៤ មីនា ២០២០ កំឡុងពេលដែលពិភពលោកបារម្ភជាខ្លាំងនឹងជំងឺកូវីដ១៩
អត្ថបទដើមនៅខាងក្រោមៈ
Book Review: ទេវបុត្រសេះស របស់អ្នកនិពន្ធ ហេង ដារី
អ្នកកំពុងស្ត្រេស៍រឿងកូរ៉ូណាអុកឡុក? នៅតែផ្ទះ មិនហ៊ានចេញក្រៅ? គិតដោយវិជ្ជមានថា នៅផ្ទះមានអីមិនល្អ? អ្នកអាចមានពេលអានសៀវភៅ មានពេលលេងនឹងកូនៗ មានពេលស្ដាប់ចំរៀងដែលអ្នកចូលចិត្ត.... ចំពោះខ្ញុំ ខ្ញុំសូមណែនាំឱ្យមកអានសៀវភៅបំបាត់អផ្សុក។
រឿងស្នេហាបែបកំប្លែង របស់អ្នកនិពន្ធ ហេង ដារី មួយក្បាលនេះ «ទេវបុត្រសេះស» ធានាថា នឹងនាំយកស្ត្រេស៍ចេញពីអារម្មណ៍បាន។ ចំណាយពេលបន្តិច ដើម្បីសុភមង្គលតូចតាចបែបនេះ ធានាថាអារម្មណ៍នឹងស្រស់ថ្លា។
ភ័យ គឺភ័យហើយ បារម្ភគឺបារម្ភហើយ តែយើងម៉េចនឹងអាចបណ្ដោយឱ្យខ្លួនយើងធ្លាក់ក្នុងវិបត្តិផ្លូវចិត្តដោយសារមេរោគខូវីដចង្រៃនេះបាន។ យើងត្រូវតែជំនះវា ហើយវិធីជំនះវាមានច្រើនរបៀប។ មនុស្សខ្លះតស៊ូនឹងខូវីដ ដោយវិធីតាមដានព័ត៌មាន រួចប្រុងប្រយ័ត្នខ្លួន ប៉ុន្តែខ្ញុំខុសគេ ខ្ញុំចូលចិត្តអានអ្វីដែលនាំអោយសើច (ហើយគេក៏ប្រហែលជាទើសនឹងខ្ញុំថា គេភ័យចង់ស្លាប់ឯងនៅសើចចេញ) ខ្ញុំរើសអានតែប្រភពព័ត៌មានដែលទុកចិត្ត ហើយខ្ញុំប្រឹងប្រែងទាញខ្លួនខ្ញុំពីវិបត្តិបាក់ទឹកចិត្តមួយនេះ ដោយជួបជាមួយមិត្ត និងគ្រួសារតាមក្រុមឆាត និង អានសៀវភៅរឿងបែបកំប្លែង។
ដូច្នេះហើយទើបខ្ញុំសូមណែនាំសៀវភៅដ៏ល្អមួយ ធានាអានហើយសើចបាត់ស្ត្រេស ស្នាដៃនិពន្ធដ៏ល្អឯកស្នេហាបែបកំប្លែង ពីអ្នកនិពន្ធ ហេង ដារី រឿង«ទេវបុត្រសេះស»។
***សូមបញ្ជាក់*** ដែលខ្ញុំខំណែនាំហូរហែរមកនេះ មិនមែនខ្ញុំជាអ្នកលក់ទេ តែឃើញសៀវភៅល្អ ក៏មានចិត្តថា ចែករំលែកឱ្យអ្នកដែលចូលចិត្តការអានដូចគ្នានឹងខ្ញុំ។
 |
| រូបថត © សុជីវី |
បង ហេង ដារី ជំនាញរបស់គាត់ គឺសរសេររឿង បែបកុមារ រឿងបែបវ័យជំទង់ ដូចជា #រឿងលោកស្រីកូន របស់គាត់ជាដើម។
ចំណែកឯ #រឿងទេវបុត្រសេះស នេះដែរ ក្រោយពីអានហើយ ខ្ញុំគិតថា ចាប់ពីអាយុ១៥ឆ្នាំឡើងទៅ អាចអានបានហើយ ព្រោះអ្នកនិពន្ធគាត់សរសេរបែបស្រាលៗ មិនស៊ីជម្រៅអីពេក ជារឿងស្នេហាបែប Cute cute។
អ្នកនិពន្ធរៀបរាប់ពីតួស្រី ឈ្មោះវីតា ដែលមានចរិកសស្លើតសស្លក់ ដើរបុកនេះបុកនោះបែកមេជើង ធ្លាក់អុកគូតនៅជណ្ដើរ ធ្វើឱ្យអ្នកអានដូចខ្ញុំ ក្នាញ់នឹងតួស្រីនោះហួស។ និយាយពីសំដីតួស្រីវិញ មិនចេះផ្អែម ១ម៉ាត់មិនឱ្យធ្លាក់ដល់ដី ហើយគប់មកវិញផាំង... សូមកោតសរសើរ អ្នកនិពន្ធចេះប្រសព្វរកពាក្យមករៀបរាប់ អោយខ្ញុំជាអ្នកអានសើចឃឹកម្នាក់ឯងកើត។
ហើយនិយាយពីតួប្រុសវិញ ជាពួកម៉ាកនឹងតួស្រីតាំងពីសម័យនៅរៀន តាមតួស្រីឱ្យស្អិត ចូលចិត្តញោះឱ្យគេខឹង តែខាងស្រីក៏ខឹងមិនសូវបានយូរ។ ខាងប្រុសនោះស្រលាញ់គេណាស់ តែមិនព្រមនិយាយប្រាប់គេទេនៅអូសក្រឡា ទុកឱ្យខាងស្រី សួរខ្លួនឯង ស្មានខ្លួនឯង ហើយឆ្លើយខ្លួនឯង។ មើលទៅ សរសេរច្រើនទៀតមិនកើតទេ វីវរបែកធ្លាយសាច់រឿងអស់ spoiled អ្នកអានក្រោយមិនខានទេ។
ជាចុងក្រោយ សូមឱ្យពិន្ទុ ៩លើ១០ សម្រាប់រឿងនេះ (មិនអោយ១០លើ១០ទេ ព្រោះថារឿងនេះខ្លីពេកត្រឹមតែជិត ២០០ទំព័រ អានមិនស្កៀបទេ) ។
ដូច្នេះ សម្រាប់រឿងនេះបើអ្នកអានជាមនុស្សចូលចិត្តរឿងស្នេហាបែបកំប្លែង ខ្ញុំសូមណែនាំឱ្យទិញសៀវភៅនេះយកមកអាន។ អានសៀវភៅដែលផ្ដល់នូវស្នាមញញឹម ដូចជាផ្ដល់នូវសេចក្ដីសុខមួយរយៈពេលសម្រាប់យើងដែរ។
____
ដោយក្ដីស្រឡាញ់ពី សុជីវី - with Heng Dary
0 Comments